Chikin Soop  (Chicken Soup)

1 chikin kot op eena weh saiz yu waahn
2 teespoon vineega er joos a 1 laim
2 teespoon seezn saal
½ teespoon blak pepa
¾ teespoon gyaalik poada
1 teespoon taim er 3 fresh taim leef
1 teespoon saiz rikaado
1 meedyom oanyan
1 meedyom sweet pepa
1 pong pitayta, peel
1 pong koako, peel
1 smaal kyabij
1 meedyom karats, peel
¼ pong okro
1 meedyom tomayto
8 onks a makaroani elbo
3 abanayro pepa
1 tayblspoon spais seed er 1 bay leef
1 pak soop (laik Magi er Kak) if yu waahn

How fu mek it: Kleen ahn rens di chikin eena laim er vineega eena  1 kop waata. Jrayn di waata aaf. Seezn di chikin wid seezn saal, blak pepa, gyaalik poada, taim, ahn rikaado. Brong di oanyan ahn di chikin eena wahn big pat. Ad 1½ kwaat a waata ahn bail it til di chikin saaf. Dais op aala di vejitablz, ahn di okro ahn tomayto. Ad aala dehn ahn di makaroani tu di pat. Mek ih bail agen. Ad een di hoal abanayro pepa dehn, di spais seed, er di bay leef. Mek ih bail agen sotay evriting saaf. Yu ku ad een wahn pak a yu fayvrit soop if yu waahn.